News, announcements and more.

Feb 22, 2019

Colombia Reflection - Rahiri Makuini Edwards-Hammond

Photo 29 01 19 2 59 49 PM

Ahurea - Culture

Ko tētahi o ōku tino kitenga mai i te ahurea o Medellin ko te whakahī me whakarangatira o te iwi kāinga mō tō rātau ahurea me ō rātau pāpori. I te Communa 8 i tino rongo i tēnei āhuatanga. I kōrero rātau mō ngā whare karakia i waihangatia e te raima mai i tēna, me tēnā o te hāpori. E kaha whakaatu ana tēnei i te āhua me ngā wāriu o te ahurea nei, arā, he whakatinanatanga o te kōrero, nou te rourou, nāku te rourou, ka ora ai te iwi.

 

Heoi, ahakoa te ataahua o te ahurea tuakiri whānui o Colombia, i rongo tonu ahau i te ngarohanga o ngā ahurea taketake. I ngā rā o nehe, kāre i ārikarika te tokomaha o ngā iwi i noho ki ngā rohe huhua o te taiororua, karawhiu ai i ngā mahi rakahinonga o aua rā. Ēngari, nā te hāmitanga i tata mimiti katoa aua āhuatanga. Nā reira, he maimai aroha tēnei ki aua iwi. I mua i tōku taenga atu ki Medellin i whakapae kē ahau, kāre e kaha kitea ngā iwi taketake i roto i ngā āhuatanga o te wiki. Engari, ko te tumanako nei, kia tae atu ngā ope rangatahi ki Colombia anō ā tōna wā, ka whai wāhi rātau kia noho tahi ki ēnei iwi taketake hei oranga mō ō tātau pākihi katoa.

 


 

Pākihi - Business

I roto i te ao Māori, he whakatauki rongonui e kī ana; “He aha te mea nui o te ao? He tangata, he tangata, he tangata!” I tō mātau pōkai atu ki Medellin, kāre ahau i paku whakapae ka whaiwhakaaro atu ahau ki taua kōrero.

Engari, e hea kē ngā wā i puta ai tēnei whakaaro e te hunga pākihi o Medellin? Ia pākihi, ia kaipākihi, koira te kakare i kārangarangatia. He aha te take? He aroha te take. He aroha mō te tangata, he aroha mō tō rātau ahurea.

 

I kōrero ngā kaipākihi mō te whai take o ngā whanaungatanga. Te hiranga o whakatipu me te manaaki i ngā hononga hei oranga pākihi. Kia mārama he oranga anō tā ia tangata tū atu i tōna tūranga mahi. I poipoi rātau ia mātau kia whai aroha ki te tangata, kia whakaatu aronga ki te whānau o te tangata. Kia kaua hoki ngā huamoni e noho i mua i te tāngata.

 

Nui rawa tōku mihi ki tēnei āhuatanga, ki ahau nei he āhuatanga me noho hei tuapapa mō ngā pākihi katoa. Koinei noaiho tētahi akoranga i tīpakohia e ahau i tō mātau wā ki Colombia, ēngari he akoranga nui mō tātau katoa ngā rangatahi e whai ana i ngā ara o te pākihi. Kei wareware, ko te aha te mea nui o te ao? He tangata!

 

Mōku ake - Personal

Medellin: He tuawhenua e patua ana e te wera a Hine Raumati ia te rā. He wāhi e kikī ana ngā tiriti taupiri ki ngā oro kaha o ngā waiata. Ko te whakakākara o te kawhe tērā e rongona. He mahi muna e haere ana i te ao, i te pō. He motu nahenahe ki te ao e mōhiotia e au.

Koira i whakahuatia e au i roto i tōku hinengaro mō tēnei wāhi e kī ana ko Colombia i mua i tōku taenga atu. Ēngari rā mō tēna.

 

I tīmata ahau i roto i taua āhuatanga whakaaro. Ko te pikitia i peitahia e te hunga papāho, te pikitia i roto i tōku hinengaro. Nā tēnei, i uru ahau ki tēnei kaupapa, he āhua maharahara tōku. Heoi, i haere ai te wā, i timata tōku tirohanga ki te whakawhānui. I huri te māhara hei mahira mō ngā āhuatanga tū atu i te huna i ngā mākete i runga maunga, i waenga pū rānei i te rohe auaha o te taone rānei. Ko te akoranga nui mōku, ko tērā whakaaro rongonui kia kaua e whakawā i te pukapuka mā tōnā uhi. Ā, nāku te honore kia rongo i tēnei akoranga ki tētahi wāhi ataahua pērā ki Medellin nei.

 

Nō reira, Medellin: Tīrara ana i roto i te toiororua o Aburra’ ko ngā ara kōpikopiko e kī ana i ngā pakiwaitara rere tonu ki ngā huarahi whānui e rārangitia ana e ngā kuia e tuitui ana i ngā taonga whakarākei manganga. I raro i ngā hīhī o te rā, he wāhi tēnei e rongo ai i te “tengo mucho calor” e puta ana i ngā waha o ngā ahi kā me ngā tūruhi kotahi. He Medellin hou tēnei, nā ōna puehu o mua kua rewa mai ngā tiriti kua tāmokotia i ngā toi pīataata. Ko ngā tamariki ērā e whana paoro ana, wero ana i ngā tauhou ka whakaeke atu.

He manawa ora, he ngākau whakahī.